Ko‘p beriladigan savollar
Xitoyda bir yillik o‘qish qancha turadi?
O‘qish narxi universitet, ta’lim yo‘nalishi va ta’lim tiliga qarab farq qiladi. Xitoyda yashash xarajatlari ko‘plab boshqa davlatlarga nisbatan ancha hamyonbop. Bundan tashqari, turar joy, ovqatlanish, sug‘urta, viza va aviachipta xarajatlarini ham hisobga olish kerak. Biz sizning budjetingizga mos universitet va dasturlarni tanlashda yordam beramiz.
Qanday grantlar mavjud va ular nimalarni qoplaydi?
Xitoy universitetlari xorijiy talabalar uchun turli xil grant va stipendiyalar taklif qiladi. Universitet va talabaning akademik natijalariga qarab, grantlar kontrakt to‘lovining bir qismini yoki to‘liq miqdorini qoplashi, ayrim hollarda esa yotoqxona yoki yashash xarajatlarini ham o‘z ichiga olishi mumkin.
Grantlar tanlov asosida beriladi va universitet talablariga bog‘liq. Odatda, ular bir o‘quv yiliga ajratiladi va talabaning o‘zlashtirishi hamda davomatiga qarab har yili uzaytiriladi.
HSK kerakmi yoki IELTS?
Bu tanlangan ta’lim dasturining tiliga bog‘liq:
- Xitoy tilidagi dasturlar: Odatda HSK sertifikati talab qilinadi. Bakalavr bosqichiga kirish uchun HSK 4 keng tarqalgan talab hisoblanadi.
- Ingliz tilidagi dasturlar: Universitet talablariga qarab IELTS yoki ingliz tilini bilish darajasini tasdiqlovchi boshqa sertifikat talab qilinishi mumkin.
Agar kerakli til sertifikatingiz bo‘lmasa, avval tayyorlov til kursida o‘qishingiz mumkin.
Ingliz tilida o‘qish mumkinmi?
Ha! Xitoyning ayrim universitetlarida, ayniqsa bakalavr va magistratura bosqichlarida, to‘liq ingliz tilida o‘qitiladigan dasturlar mavjud.
Bunday imkoniyat tanlangan universitet va yo‘nalishga bog‘liq. Biz sizning akademik ma’lumotingiz va til ko‘nikmalaringizga mos dasturlarni tanlashda yordam beramiz.
Universitetdan oldin bir yillik til kursi bormi?
Ha. Xitoy universitetlarida 6 oylik yoki 1 yillik xitoy tili kurslarida o‘qish mumkin. Zarurat bo‘lsa, kurs muddatini uzaytirish ham mumkin.
Agar talaba bir yil ichida HSK 4 darajasiga erishsa, universitet talablariga javob bergan holda bakalavr bosqichiga o‘tishi mumkin.
Uzoqroq muddatli til kurslari ham mavjud. 18 yoshga to‘lmagan talabalar uchun ayrim holatlarda 2 yillik til kursiga kirish talab etilishi mumkin.
Hujjat topshirishni qachon boshlash kerak?
Rejalashtirilgan jo‘nab ketish sanasidan kamida 8–10 oy oldin hujjat tayyorlashni boshlashni tavsiya qilamiz.
Xitoy universitetlarida ikkita asosiy qabul mavsumi mavjud:
- Kuzgi qabul: O‘qish sentyabr oyida boshlanadi. Hujjatlarni oldindan tayyorlash tavsiya etiladi.
- Bahorgi qabul: O‘qish fevral oxiri yoki mart oyining boshida boshlanadi.
Qabul natijalari odatda bahorgi semestr uchun yanvar–fevral oylarida, kuzgi semestr uchun esa may–iyun oylarida e’lon qilinadi.
Erta topshirish hujjatlarni tayyorlash, universitetga kirish va viza jarayonlarini xotirjam yakunlash uchun ko‘proq vaqt beradi.
Qanday hujjatlar kerak?
Odatda quyidagi hujjatlar talab qilinadi:
- Xorijga chiqish pasporti
- Fotosurat
- Maktab attestati yoki universitet diplomi
- Baholar ilovasi (transkript)
- Ta’lim hujjatlarining notarial tasdiqlangan tarjimasi
- Tibbiy ma’lumotnoma (universitet belgilagan shaklda)
- Sudlanmaganlik haqida ma’lumotnoma (notarial tarjimasi bilan)
- 18 yoshga to‘lmaganlar uchun ota-ona roziligi va vasiylik hujjatlari
Universitet va yo‘nalishga qarab qo‘shimcha hujjatlar ham talab qilinishi mumkin. Biz hujjatlarni tayyorlash va topshirish jarayonida to‘liq yordam beramiz.
Yotoqxonalar qanday va narxi qancha?
Xitoy universitetlarining aksariyatida talabalar uchun jihozlangan yotoqxonalar mavjud. Universitetga qarab, bir yoki ikki kishilik xonalar, alohida yoki umumiy hammom, internet, kir yuvish xonalari va umumiy foydalanish joylari bo‘lishi mumkin.
Narxlar shahar, universitet va xona turiga qarab farqlanadi. Biz sizga mos turar joyni tanlash va xarajatlarni oldindan aniqlashda yordam beramiz.
Xitoyda halol ovqat bormi?
Ha! Ko‘plab universitetlarning oshxonalarida alohida halol ovqatlanish bo‘limlari mavjud. Shaharlarda halol restoranlar va halol go‘sht sotiladigan supermarketlarni ham topish mumkin.
Talabalar, shuningdek, ovqat tayyorlash uchun sharoit mavjud bo‘lsa, o‘zlari ham ovqat pishirishlari mumkin. Xitoyning ko‘plab shaharlarida masjidlar va musulmon jamoalari ham bor.
Xitoy universiteti diplomi O‘zbekistonda tan olinadimi?
Ha, Xitoy universitetlarining diplomlari O‘zbekistonda tan olinishi mumkin. Universitet, ta’lim yo‘nalishi va amaldagi qonunchilikka qarab, diplomni tan oldirish (nostrifikatsiya) jarayonidan o‘tish talab qilinishi mumkin.
Biz universitet tanlashda uning akkreditatsiyasi va diplomining tan olinishi bilan bog‘liq jihatlarga e’tibor qaratamiz.
O‘qish davomida ishlash mumkinmi?
Xitoyda xorijiy talabalarning ishlashi migratsiya qoidalari va universitet ruxsatiga bog‘liq. Talabalik yashash ruxsatnomasi bilan bemalol ishlash mumkin deb hisoblash noto‘g‘ri.
Ruxsat etilgan amaliyot yoki yarim stavkali ishlar tegishli talablar asosida amalga oshirilishi kerak.
Xizmatlaringiz qancha turadi va o‘qishga kira olmasam nima bo‘ladi?
Bizning to‘liq xizmat paketimiz narxi 2 500 AQSH dollari. To‘lov amaldagi davlat kursi bo‘yicha so‘mda amalga oshiriladi.
Paketga quyidagi xizmatlar kiradi:
- Dastlabki konsultatsiya va universitet tanlash
- Hujjatlarni tayyorlash va topshirish
- Kamida 5 ta universitetga ariza yuborish
- Suhbat va imtihonlarga tayyorlash
- Qabul hujjatlarini rasmiylashtirish va yetkazish
- Talabalik vizasiga topshirishda yordam
- Xitoyga safarni tashkillashtirish
- Jo‘nab ketishdan oldin va keyin doimiy yordam
Bir nechta universitetga hujjat topshirish orqali o‘qishga kirish imkoniyatlaringizni oshirishga harakat qilamiz.
Agar talaba o‘qishga qabul qilinmasa yoki grant ololmasa, pulni qaytarish shartlari xizmat ko‘rsatish shartnomasida belgilanadi. Barcha shartlar shartnoma imzolanishidan oldin tushuntiriladi.